302

نئے تعینات ہونے والے ڈپٹی کمشنر ارشاد سدھیر کا بائی روڈ چترال پہنچنے پر عشریت، نغر اور دروش کے مقامات پر عوام نے پرتپاک استقبال

چترال (نمائندہ ڈیلی چترال) چترال میں نئے تعینات ہونے والے ڈپٹی کمشنر ارشاد سدھیر کا بائی روڈ چترال پہنچنے پر عشریت، نغر اور دروش کے مقامات پر عوام نے پرتپاک استقبال کیا اور انہیں اپنے مسائل سے بھی آگاہ کیاجہاں ایڈیشنل ڈپٹی کمشنر منہاس الدین اور اسسٹنٹ کمشنر عبدالاکرم خان نے انہیں خوش آمدید کہا ۔ ان مقامات پر عوام سے خطاب کرتے ہوئے انہوں نے کہاکہ وہ خدمت کا ایک مشنری جذبہ اور ولولہ لے کر چترال آئے ہوئے اور اپنا دروازہ چوبیس گھنٹے عوام کے لئے کھلا رکھیں گے اور وہ ان افسران میں ہرگز نہیں ہیں جن کے دروازوں پر سائلیں کو بتایا جاتا ہے کہ صاحب آرام کررہے ہیں ۔ انہوں نے کہاکہ عوام کا تعاون انہیں ہر قدم اور ہر مرحلے پر درکا ر ہوگا کیونکہ ڈی۔ سی کے پاس آلہ دین کا چراغ نہیں ہے کہ ہر مسئلہ ایک آن میں حل ہوجائے جبکہ حقیقت یہ ہے کہ ہر مسئلہ کا حل عوام کو ساتھ لے کر ڈھونڈنے میں ہی کامیابی ہوتی ہے۔ انہوں نے کہاکہ وہ عوامی مسائل معلوم کرنے کے لئے نہ صرف کھلی کچہریاں لگائیں گے بلکہ مسائل کے حل کے سلسلے میں متعلقہ افسران سے کام لینے کو بھی یقینی بنائیں گے اور زبانی جمع خرچ پر وہ یقین نہیں رکھتے اور عملی کام لیتے رہیں گے۔ ارشاد سدھیر نے کہاکہ ان کا بائی روڈ چترال آنے کا مقصد ہی یہ تھا کہ وہ لواری ٹاپ سے لے کر چترال شہر تک حالات کا خود جائزہ لے سکے۔ دروش ٹاؤن کے عمائدیں حیدر عباس، حاجی سلطان، قاری جمال عبدالناصر، رضیت باللہ، سہراب خان اور دوسروں نے ان کے سامنے علاقے کے مسائل بیان کئے اور اس امید کا اظہار کیاکہ وہ سابق ڈی۔سی اسامہ شہید کے نقش قدم پر چل کر عوام کا دل جیت لیں گے۔

اس خبر پر اپنی رائے کا اظہار کریں