35

چترال کے عوام دینی جماعتوں کے اتحاد متحدہ مجلس عمل کے امیدواروں کے حق میں اپنا ووٹ استعمال کریں/قاری فیض اللہ چترالی

چترال(ارشاد اللہ شاد)چترال کے نامور عالمدین اور معروف سماجی شخصیت قاری فیض اللہ چترالی نے چترال کے عوام سے اپیل کی ہے کہ 25جولائی کے انتخابات میں عوام اپنا قیمتی ووٹ دینی جماعتوں کے ملک گیر اتحاد متحدہ مجلس عمل کے نامزد امید واروں کے حق میں استعمال کرکے انہیں کامیاب کریں۔ میڈیا کے توسط سے چترال کے عوام کے نام اپنے خصوصی پیغام میں ضلع چترال کی معروف دینی اور سماجی شخصیت قاری فیض اللہ چترالی نے انتخابات کے حوالے سے کہا کہ25جولائی کو ہونے والے انتخابات ملک و قوم کے مستقبل کے ساتھ ساتھ دین اسلام، اسلامی نظریئے اور ملک کے نظریاتی تشخص کے تحفظ کے حوالے سے بھی خصوصی اہمیت رکھتے ہیں۔ آج قوم کو ایسی قیادت کے انتخاب کا امتحان در پیش ہے جو ملک و قوم کی ناو کو قومی و بین الاقوامی مسائل اور معاشی و اقتصادی مشکلات کے بھنور سے کامیابی سے نکالے اور قوم کے نظریاتی تشخص، ملک اور دستور کی اسلامی اساس کی حفاظت یقینی بنائے۔ انہوں نے کہا کہ ان تمام مسائل کے حل اور مشکلات سے نبرد آزما ہونے کے لئے سیاسی بصیرت، معاملہ فہمی اور دور اندیشی کی خصوصیات کے ساتھ قیادت کا مالی و اخلاقی کرپشن سے پاک و بے داغ ہونا اور ملکی مسائل کے حل کا شعور اور ادراک رکھنا بے حد ضروری ہے۔ انہوں نے کہا کہ متحدہ مجلس عمل ملک و قوم کی قیادت اور رہنمائی کے لئے سب سے بہتر انتخاب ثابت ہوگی۔ ایم ایم اے کے تمام امید وار کرپشن اور بد عنوانی سے پاک ہونے کے ساتھ ساتھ ذاتی اور اخلاقی اعتبار سے بھی اعلی کردار کے مالک ہیں اور ملک کی قیادت کی مطلوبہ اہلیت سے مکمل طور پر بہرہ ور ہیں۔ مجلس عمل کے امید واروں میں کوئی بھی کرپٹ، بد عنوان، جرائم میں ملوث اور نیب یا پاناما زدہ شامل نہیں ہے، اس لئے مجلس عمل قوم کے حالات بہتر بنانے اور ملک کو ترقی و خوشحالی کی شاہراہ پہ گامزن کرنے کی پوری صلاحیت رکھتی ہے۔ انہوں نے کہا کہ چترال کے عوام خوب سوچ سمجھ کر اور اچھی طرح دیگر پارٹیوں کے امیدواروں کے ساتھ موازنہ کرکے اپنا ووٹ متحدہ مجلس عمل کے امیدواروں کے حق میں استعمال کریں۔

Print Friendly, PDF & Email