چترال سکاؤٹس چھاونی دروش میں فرنٹیر کور کے دو سو پچاس جوانوں کی پاسنگ آوٹ پریڈ

چترال (نمائندہ ڈیلی چترال) فرنٹیر کور کے دو سو پچاس جوانوں کی پاسنگ آوٹ پریڈ چترال سکاؤٹس چھاونی دروش میں ہوئی ۔ جنرل آفیسر کمانڈنگ ملاکنڈ ڈویژن میجر جنرل نادر خان مہمان خصوصی تھے ۔ بریگیڈیر ضیاء الاسلام اور کمانڈنٹ چترال سکاؤٹس کرنل نظام الدین شاہ کے علاوہ فوجی آفیسران علاقائی عمائدین کی بڑی تعداد اس موقع پر موجود تھی ۔ تربیت یافتہ جوانوں سے ملک کی سالمیت اور بقا کیلئے ہر قسم کی قربانی دینے کے حوالے سے قسم لی گئی ۔ اور میجر جنرل نے پا سنگ آوٹ پریڈ کی سلامی لی ۔ اس موقع پر جی او سی نے اپنے خطاب میں کہا ۔ کہ یہ جوانوں کیلئے ایک یادگار لمحہ ہے ۔کہ وہ باقاعدہ طور پر تربیت حاصل کرکے ایک پیشہ ور سپاہی کی حیثیت سے ملک کی سالمیت کی ذمہ دار ی سنبھال رہے ہیں ۔ چترال سکاوٹس نے ہمیشہ سے ضرب کلیمی کا شعور بیدار کیا ہے ۔ اور اس فورس کا کردار لائق تحسین و آفرین رہا ہے ۔ انہوں نے کہا ۔ کہ پاکستان انتہائی نازک موڑ سے گزر رہا ہے ۔ کیونکہ دشمن مسلسل ہمیں نشانہ بنانے کی کو شش میں ہے ۔ ماضی میں غیر ملکی عناصر کے کہنے پر مساجد ، سکولوں اور عوام کو نہیں بخشا گیا ۔ لیکن ان ملک دشمنوں کا قلع قمع کرنے کیلئے فرنٹیر کور نے مثالی کردار ادا کیا ۔ اب خدا کے فضل اور ہمارے جوانوں کی لازوال قربانیوں سے اُن کا صفایا ہو گیا ہے ۔ اور ضرب عضب انتہائی کامیابی سے اپنے اہداف حاصل کر چکا ہے ۔ انہوں نے نوجوانوں سے اس امید کا اظہار کیا ۔ کہ وہ اپنے پیشرووں کے نقش قدم پر چل کر ملک کی سالمیت پر کوئی حرف نہیں آنے دیں گے ۔ انہوں نے کہا ۔ کہ ہمارے یونیفارم کی عزت و احترام اس ملک اور اس قوم کی وجہ سے ہے ۔ اس لئے ملک کی بقا اور قوم کی عزت جوانوں پر اولین فرض ہے ۔ جی او سی نے کہا ۔ ہم پر جو ذمہ داری ڈالی گئی ہے ۔ ہمیں ہر صورت میں اُسے نبھانا چاہیے۔ نتیجے کو اللہ پر چھوڑنا چاہیے ۔انہوں نے کہا ۔ کہ قائد اعظم کے فرمان ایمان ، یقین اور تنظیم پر کار بند رہنے کی ضرورت ہے ۔ ہمیں کسی بھی صورت غافل نہیں رہنا چاہیے ۔ کیونکہ دشمنوں کی نظر ہماری طرف ہے ۔ جی او سی نے تربیت کے دوران نمایان کارکردگی کے حامل جوانوں کو اعزازات دیے ۔ جبکہ فرنٹیر کورکے اعزازی شمشیر کو اعلی کارکردگی کے حامل نوجوان مقبول الہی کو دیا گیا ۔