بالائی چترال کے علاقہ ہرچین لاسپور کے گورنمنٹ ہائی سکول میں مبینہ طور پر تشدد کا شکار ہونے والی طالبہ نے زہر کھا کر خود کُشی کرلی

چترال ( محکم الدین محکم) بالائی چترال کے علاقہ ہرچین لاسپور کے گورنمنٹ ہائی سکول میں مبینہ طور پر  تشدد کا شکار ہونے والی طالبہ نے زہر کھا کر خود کُشی کرلی ۔ خود کُشی کرنے والی طالبہ کی لاش کو پوسٹ مارٹم کیلئے بونی لے جایا گیا ہے ۔ ذرائع کے مطابق دسمبر2015میں خود کُشی کرنے والی یتیم طالبہ طاہرہ بی بی دختر شپیر خان مرحوم اپنے گھر سے سکول آرہی تھی ۔ کہ راستے میں گورنمنٹ ہائی سکول ہرچین کے کلاس فور ملازم دیدار علی ولد علاوتی خان نے مبینہ طور پر اُسے جنسی تشدد کا نشانہ بنایا ۔ جس پر ملازم کے خلاف طالبہ نے مقدمہ دائر کیا ۔ جو کہ مقامی عدالت میں زیر سماعت ہے ۔ تاہم طالبہ کو اس زیادتی کا شدید طور پر قلق تھا ۔ جمعہ کے روز مذکورہ طالبہ ہائی سکول ہرچین آئی اور سکول کے اندر زہر کھا کر خود کُشی کر لی ۔ طاہرہ زہر کھانے کے بعد تڑپتی رہی ۔ لیکن اُسے بچانے کیلئے کوشش کی گئی ۔ اور نہ اُسے ہسپتال پہنچانے کا انتظام کیا گیا ۔ جبکہ لاش بھی کئی گھنٹوں تک سکول میں پڑا رہا ۔ جسے بعد آزان مستوج پولیس کے حوالے کر دیا گیا ۔ پولیس نے لاش کو پوسٹ مارٹم کیلئے بونی روانہ کر دیا ہے ۔ ذرائع کے مطابق یتیم طاہرہ کو انصاف ملنے کی توقع نہیں تھی ۔ اس لئے اُس نے دلبرداشتہ ہو کر زہر کھا کر اپنی زندگی کا چراغ خود گُل کر دیا ۔