Site icon Daily Chitral

چترال کے طول و عرض میں گذشتہ چوبیس گھنٹے سے بارشوں کا سلسلہ جاری،ندی نالوں میں طغیانی

فائل فوٹو

چترال(محکم الدین)پیراورمنگل کی درمیانی شام سے بغیرکسی وقفے کے چترال اورمضافات میں بارش کا سلسلہ جاری ہے جس کے نتیجے میں سڑکیں اور پیدل راستے تالاب کا منظر پیش کر رہے ہیں۔ خراب اور کچی سڑکیں اوپرسے مسلسل بارش نے لوگوں کو گھروں سے نکلنے کے راستے تک بند کر دیے ہیں جس سے آمدو رفت بری طرح متاثر ہوئی ہے ،ڈھلوان پہاڑی سڑکوں پر اوپر سے پتھر اور پہاڑی تودے گرنے کا سلسلہ بھی جاری ہے.اور لوگ خوف کے سائے میں سفر کرنے پرمجبور ہیں۔کالاش ویلیز روڈ پر کئی مقامات پر پتھر اور پہاڑی تودے گرے ہیں جہاں ڈرائیور اور مسافر عارضی راستہ بنا کر مشکل سے کراس کرتے ہوئے اپنا سفر جاری رکھے ہوئے ہیں۔حالیہ بارش کا دورانیہ اتنا طویل ہو گیا ہے کہ کچے مکانات اور زمین نرم ہونے سے مزید حادثات کے شدید خطرات پیدا ہو گئے ہیں۔مقامی بزرگوں کے مطابق مسلسل بارشوں سے ایک طرف پھلدار درختوں کے پھل لگنے سے پہلے ہی گر گئے ہیں اور دوسری طرف گندم کی فصل کو ایک مخصوص بیماری لگنے کا خطرہ پیدا ہو گیا ہیجس میں گندم کے خوشے میں دانے کالے پڑ جاتے ہیں،اسے مقامی زبان میں (شاغیری) کہا جاتا ہے لیکن اپر چترال میں اس کا خطرہ کم ہے کیونکہ اپر چترال میں گندم کے خوشے لگنے میں اب بھی کئی مہینے باقی ہیں اور بعض علاقوں میں گندم زمین پر نمودار ہی نہیں ہوئے ہیں۔بارشوں سے مختلف ندی نالوں میں جان پیدا ہوئی ہے اور پانی روان دوان ہیں جس پر لوگ خوشی کا اظہا ر کر رہے ہیں کیونکہ بڑے عرصے بعد زمین میں وافر مقدار میں پانی جمع ہوا ہے جس سے لوگ استفادہ کریں گے۔
موری لشٹ(رفیق احمد) چموروک گول میں منگل کی شام طغیانی کی وجہ سے چترال بونی روڈ ٹریفک کے لئے عارضی طور پر بند ہوگئی جسکی وجہ سے مسافروں کو پریشانی کا سامنا کر نا پڑا۔

Exit mobile version