چترال سکاؤٹس کومتاثرین کی مشکلات کا بھر پور احساس ہے،مصیبت کی اس گھڑی میں ہم آپ کے ساتھ ہیں۔ کمانڈنٹ چترال سکاؤٹس کرنل نظام الدین شاہ

چترال ( نمائندہ ڈیلی چترال) کمانڈنٹ چترال کرنل نظام الدین شاہ نے گذشتہ روز بالائی چترال کے سیلاب اور زلزلے سے متاثرہ علاقوں کا دورہ کیا ۔ اور ریشن ، کوراغ ،موڑکہو ، چرون اویر،موردیر ، کوشٹ اور سہت کے متاثرین میں امدادی اشیاء تقسیم کیں ۔ جبکہ مستوج ،یارخون وغیرہ علاقوں کے لئے سامان روانہ کئے گئے ۔ یہ سامان مختلف اداروں کی طرف سے متاثرین میں تقسیم کرنے کیلئے چترال سکاؤٹس کو فراہم کئے گئے تھے ۔امدادی سامان میں کمبل ، رضائیاں ، گرم سوئیٹر، کیچن کے سامان اور ترپال شامل ہیں ۔ اس موقع پر کمانڈنٹ چترال سکاؤٹس نے متاثرہ خاندانوں سے دلی ہمدردی کا اظہار کیا ۔ اور کہا ۔ کہ چترال سکاؤٹس کو آپ کی مشکلات کا بھر پور احساس ہے ۔ اور مصیبت کی اس گھڑی میں ہم آپ کے ساتھ ہیں ۔ ہماری کوشش ہے ۔ کہ ہم ہر ممکن طریقے سے اس مشکل وقت میں آپ کی مدد کریں ۔ متاثرین نے کمانڈنٹ چترال سکاؤٹس کی ہمدردی اور امدادی سامان کی فراہمی پر اُن کا شکریہ ادا کیا ۔ اور سیلاب و زلزلے کے دوران چترال سکاؤٹس کی طرف سے کئے جانے والے اقدامات کی تعریف کی ۔ متاثرین نے سیلاب اور زلزلے سے متاثر ہونے والی سڑکوں ، نہروں اور آبپاشی سکیموں کے حوالے سے کمانڈنٹ چترال سکاؤٹس کو آگاہ کیا ۔اور اُن سے اس سلسلے میں اقدامات اُٹھانے کی اپیل کی ۔ کمانڈنٹ چترال سکاؤٹس نے کہا ۔ کہ اس سلسلے میں متعلقہ اداروں کو ہدایات دیے جائیں گے ۔ اور انشاللہ بتدریج مسائل حل کئے جائیں گے ۔ امدادی سامان بارہ سو خاندانوں میں تقسیم کئے گئے ۔ جن میں دیگر متاثرین کے علاوہ چترال سکاؤٹس اور آرمی کے ایکس سروس مین شامل ہیں ۔