لوئر چترال: این ایچ اے روڈ کے لیے حاصل کردہ املاک 7 روز میں خالی کرنے کا حکم
چترال (نیوز ڈیسک): نائب تحصیلدار لینڈ ایکوزیشن لوئر چترال نے این ایچ اے روڈ کی تعمیر کے لیے ایکوائر کی گئی زمینوں، مکانات اور دکانوں کے مالکان کے لیے ایک اہم حکم نامہ جاری کیا ہے۔
جاری کردہ نوٹس کے مطابق، تحصیل چترال کے علاقوں راغ سے موری لشت تک سڑک کی تعمیر کے لیے جن مالکان کی زمینیں، دکانیں یا مکانات سرکاری تحویل میں لیے گئے تھے اور جن کے مالکان معاوضہ وصول کر چکے ہیں، انہیں اپنی املاک خالی کرنے کے لیے سات (07) دن کی مہلت دی گئی ہے۔
انتظامیہ کی جانب سے جاری کردہ اشتہار میں واضح طور پر انتباہ دیا گیا ہے کہ:
”جن لوگوں نے اپنی املاک کا معاوضہ وصول کر لیا ہے، وہ سات روز کے اندر اندر جگہ خالی کر دیں۔ مقررہ مدت گزرنے کے بعد جگہ خالی نہ کرنے کی صورت میں مالکان کے خلاف سخت قانونی کارروائی عمل میں لائی جائے گی۔”
واضح رہے کہ یہ نوٹس 9 اپریل 2026 کو جاری کیا گیا ہے، جس کا مقصد سڑک کی تعمیر کے منصوبے میں حائل رکاوٹوں کو دور کرنا اور کام کی بروقت تکمیل کو یقینی بنانا ہے۔ متعلقہ مالکان کو ہدایت کی گئی ہے کہ وہ کسی بھی ناخوشگوار قانونی کارروائی سے بچنے کے لیے دی گئی ڈیڈ لائن پر عمل درآمد کریں۔
