اقبال ماڈل سکول ایون میں سالانہ امتحانات کے نتائج کے اعلان کے سلسلے میں پر وقار تقریب

چترال ( محکم الدین ) اقبال ماڈل سکول ایون میں سالانہ امتحانات کے نتائج کے اعلان کے سلسلے میں ایک پر وقار تقریب منعقد ہوئی ۔جس میں بڑی تعداد میں مقامی عمائدین ، والدین ،اساتذہ اور طلباء و طالبات نے شرکت کی ۔ سابق ڈی ایس پی سلطان بادشاہ تقریب کےمہمان خصوصی تھے ۔ جبکہ سابق چیرمین یوسی ایون محکم الدین نے صدر محفل کے فرائض انجام دی ۔ سکول کے طلبہ نے حمد پاک ،نعت شریف ، دعا اور ملی نغمے پیش کئے ،اور بعض طلباء وطالبات نے انگریزی ،اردو زبان میں تقریرکرتے ہوئے قرآن مجید کی عظمت ، تعلیم کی اہمیت ، اور اساتذہ کرام کے احترام پر تفصیل سے روشنی ڈالی ۔ اسی طرح بعض طلبہ نےمسلمانوں کی زبوں حالی ،تعلیم سے دوری اور پستی کی وجوہات کو موضوع سخن بنایا ۔اور کہا ۔ کہ مسلمانوں نے جب اسلامی اصولوں سے روگردانی کی ،علم و تحقیق اور جستجو کو پس پشت ڈالا۔ تب سے پستی ان کا مقدر بنی ۔ اس موقع پر چترال کے معروف سماجی کارکن عنایت اللہ اسیر نے اپنے خطاب میں طلبہ پرزور دیا ۔ کہ وہ تعلیم پر محنت کو اپنا شعار بنائیں ۔ اور اچھے نمبروں سے کامیابی حاصل کرکےملک و ملت اپنے علاقے اور لوگوں کی خدمت کریں ۔ باصلاحیت اچھے نمبروں کے حامل طلبہ کو تعلیم پر خرچ کرنے کی ضرورت نہیں پڑتی ۔ دوسرے ادارے اپنا سرمایہ خرچ کرکے اعلی تعلیم کے حصول میں ان کی مدد کرتے ہیں ۔ انہوں نے اس بات پر افسوس کا اظہار کیا ۔ کہ اب رقص (ڈانس) کو سکول کے نصاب میں شامل کرنے کی باتیں ہورہی ہیں ۔ اور اہل مغرب فنڈ فراہم کرکے ہماری غربت کا تماشا کررہے ہیں ۔ مہمان خصوصی ریٹائرڈ ڈی ایس پی سلطان بادشاہ نے سکول کی کارکردگی پر اطمینان کا اظہار کیا ۔اور کہا ۔ کہ سکول کے طلباء کے اچھے نتائج ،ڈسپلن اور ہم نصابی سرگرمیوں میں ان کی دلچسپی و آدائیگی تعریف کے لائق ہیں ۔ صدر محفل محکم الدین نے کہا ۔ کہ علم دولت اور طاقت دونوں فراہم کرتا ہے ۔ آج امریکہ علم کی دولت اور طاقت سے پوری دنیا پر حکمرانی کر رہا ہے ، والدین اپنے اور اپنے بچوں کے روشن مستقبل کیلئے تعلیم پر سرمایہ کاری کریں ۔ پرنسپل سکول غلام مصطفی نےبچوں کے والدین پر زور دیا ۔ کہ گھر کےماحول میں بچوں پر توجہ دیں ۔ اور روزانہ کی بنیاد پر ہوم ورک اپنی نگرانی میں مکمل کروائیں ۔ اور بچوں کے بارے میں سکول سے رابطہ رکھیں ۔ تاکہ بچوں کا وقت ضائع نہ ہو ۔ انہوں نے تقریب میں شرکت کرنے پر مہمانوں ،والدین ،اساتذہ اور طلباء و طالبات کا شکریہ ادا کیا ۔ تقریب کے اختتام پر اول ،دوئم سوئم پوزیشن حاصل کرنے والے طلباء و طالبات میں ٹرافی اور میڈلز تقسیم کئے گئے ۔ اقبال ماڈل سکول ایون میں ریزلٹ اناونسمنٹ کی پر وقار تقریب ، کامیاب طلبہ میں ٹرافی اور میڈلز تقسیم کئے۔