136

رکن قومی اسمبلی غزالہ انجم نے وزیر اعظم پاکستان سے ملاقات میں چترال میں حالیہ بارشوں اور قدرتی آفات کے حوالے سے انہیں اہالیان چترال کی مشکلات سے آگاہ کیا

چترال(نمائندہ ) پاکستان مسلم لیگ(ن) کے چترال سے تعلق رکھنے والی خاتون ایم این اے غزالہ انجم نے جمعہ کے روز وزیرا عظم اسلامی جمہوریہ پاکستان میاں شہباز شریف سے ان کے دفتر میں ملاقات کرکے چترال میں حالیہ بارشوں اور قدرتی آفات کے حوالے سے انہیں اہالیان چترال کی مشکلات سے آگاہ کیا۔ وزیر اعظم نے مشکلات ومسائل سے آگاہی حاصل کرنے کے بعد فوری طور پر این ڈی ایم اے کے حکام کو ہدایات جاری کردی کہ وہ ایم این اے غزالہ انجم سے تفصیلات لے کر بارش کے متاثرین کی دوبارہ آبادکاری اور انفراسٹرکچر ز کی بحالی کے لئے ایک جامع پلان مرتب کرے۔ وزیرا عظم نے غزالہ انجم کو یقین دلایاکہ مسلم لیگ (ن)کی حکومت مشکل کی اس گھڑی میں چترال کے متاثرہ بہن بھائیوں کے ساتھ ہے اور ا ن کے مسائل کو حل کرنے میں کوئی کسر نہیں چھوڑ اجائے گا۔ایم این اے غزالہ انجم نے چترالی عوام کی طرف سے وزیر اعظم کا شکریہ ادا کرتے ہوئے کہاکہ مسلم لیگ (ن) کے سربراہ میاں نواز شریف کا ہر دورحکومت چترال میں تعمیر وترقی کا دور ثابت ہوا اور قدرتی آفات میں بھی چترالی عوام کو بھر پور توجہ مل گئی جب 2015ء کے قیامت خیز زلزلے کے بعد چترال کے متاثریں میں وفاقی حکومت کی طرف سے 2ارب روپے کی خطیر رقم تقسیم ہوئی۔

اس خبر پر اپنی رائے کا اظہار کریں

اپنا تبصرہ بھیجیں