مقامی ٹور گائیڈز کے لیے تین روزہ کیپیسٹی بلڈنگ ورکشاپ برائے اخلاقی سیاحت کامیابی سے مکمل
بمبوریت ( فتح اللہ) مقامی ٹور گائیڈز کی صلاحیتوں میں اضافہ اور اخلاقی سیاحت کے اصولوں سے آگہی کے لیے منعقدہ 3 روزہ کیپیسٹی بلڈنگ ورکشاپ آج کامیابی سے اختتام پذیر ہو گئی۔ یہ ورکشاپ کالاش پیپلز ڈیولپمنٹ نیٹ ورک (KPDN) نے آغا خان رورل سپورٹ پروگرام (AKRSP) کے تعاون سے منعقد کی، جس میں مقامی ٹور گائیڈز، ہوٹل انڈسٹری سے وابستہ افراد اور کمیونٹی نمائندگان نے بھرپور شرکت کی۔
ورکشاپ کے دوران شرکاء کو پائیدار، ذمہ دار اور اخلاقی سیاحت کے فروغ سے متعلق تفصیلی تربیت فراہم کی گئی، جبکہ ممتاز مقررین نے اپنے تجربات اور سفارشات بھی پیش کیں۔
لوک رحمت، سی ای او KPDN نے اخلاقی سیاحت اور کالاش ثقافت کی تفہیم پر جامع پریزنٹیشن دی۔ یاسر علی، نائب صدر بمبوریت ہوٹل ایسوسی ایشن نے ٹور گائیڈز اور ہوٹل انڈسٹری کے باہمی کردار کو اجاگر کیا۔
زارین خان، انفورسمنٹ آفیسر، KP کلچر اینڈ ٹورازم اتھارٹی نے ورکشاپ کی اعلیٰ کارکردگی کو سراہتے ہوئے اعلان کیا کہ سرٹیفکیٹ حاصل کرنے والے گائیڈز کو لائسنس کے حصول میں 30 سے 40 اضافی نمبر دیے جائیں گے۔
اسی طرح حضرت گل، لیڈی ہیلتھ وزیٹر نے فرسٹ ایڈ کی عملی تربیت کروائی اور ٹور کے دوران ہنگامی حالات سے نمٹنے کے عملی طریقے سکھائے۔
اکرم حسین، اسسٹنٹ ڈائریکٹر کلچر، KVDA نے محکمہ ثقافت کی کاوشوں پر روشنی ڈالتے ہوئے ورکشاپ کے انعقاد کو قابلِ ستائش قرار دیا۔
ورکشاپ کے تینوں دنوں میں ذمہ دار سیاحت، ماحولیاتی تحفظ، ثقافتی حساسیت اور کمیونٹی انگیجمنٹ جیسے اہم موضوعات شامل رہے، جن کا مقصد گائیڈز کو مزید پیشہ ورانہ مہارت اور سیاحوں کے لیے معیاری و مستند تجربہ فراہم کرنا تھا۔
اختتامی روز منہاز الدین، ڈائریکٹر جنرل کالاش ویلیز ڈیولپمنٹ اتھارٹی (KVDA) نے بطور مہمانِ خصوصی شرکت کی۔ انہوں نے اخلاقی سیاحت کی ضرورت و اہمیت پر زور دیتے ہوئے اعلان کیا کہ سرٹیفکیٹ حاصل کرنے والے امیدواروں کو KVDA کی آئندہ بھرتیوں میں ترجیح دی جائے گی۔
تقریب کے آخر میں شرکاء میں سرٹیفکیٹ تقسیم کیے گئے، جبکہ مقامی ٹور گائیڈز نے متفقہ طور پر کالاش ویلیز ٹور گائیڈز ایسوسی ایشن قائم کرنے کا اعلان کیا۔
نئے عہدیداران میں اشفاق احمد صدر اور زرینہ جنرل سیکرٹری منتخب ہوئیں۔
نئی منتخب قیادت نے ڈی جی KVDA کو ایک قرارداد پیش کی جس میں لائسنس کی تجدید، ایکسپوژر وزٹس اور مزید افراد کے لیے تربیتی پروگرام منعقد کرنے کی درخواست کی گئی۔
ورکشاپ کا یہ انعقاد علاقے میں پائیدار اور ذمہ دار سیاحت کے مضبوط نظام کی تشکیل کی جانب ایک اہم قدم قرار دیا جا رہا ہے، جو نہ صرف مقامی کمیونٹیز بلکہ آنے والے سیاحوں کے لیے بھی مثبت اثرات کا حامل ثابت ہوگا۔
