ٹاون ہال چترال میں ڈویژن کی سطح پر نعت ، اردو اورانگریزی میں تقریری مقابلے منعقدہوئے جن میں اپر چترال، لویر چترال، اپر دیر اور لویر دیر کی سرکاری سکولوں سے طلباء نے شرکت کی

چترال (ڈیلی چترال نیوز) ٹاون ہال چترال میں ڈویژن کی سطح پر نعت ، اردو اورانگریزی میں تقریری مقابلے منعقدہوئے جن میں اپر چترال، لویر چترال، اپر دیر اور لویر دیر کی سرکاری سکولوں سے طلباء نے شرکت کی۔ اس موقع پر ڈی ای او لویر چترال مفتاح الدین مہمان خصوصی تھے جس نے طلباء میں انعامات تقسیم کی۔ انہوں نے اپنے خطاب میں کہاکہ اس علاقے میں طلباء میں صلاحیت کی کوئی کمی نہیں ہے جبکہ ضرورت صرف اور صرف ایسے مواقع کی فراہمی کے ذریعے ان کی صلاحیتوں کو اجاگرکرنا ہے۔ جیوری کے فیصلے کے مطابق نعت خوانی میں گورنمنٹ ہائی سکو ل ریری اپر چترال کے افضل حیات پہلے نمبر پر، ہائی سکول دیر اپر کے محمد یاسین دوسرے اور ہائی سکول ریشن اپر چترال کے وسیع الرحمن تیسرے نمبر پررہے۔ اسی طرح اردو تقریر کے مقابلے میں ہائی سکول چترال کے صفوان اللہ، ہائی سکول موژگول اپر چترال کے ذیشان احمد اور ہائی سکول لعل قلعہ لویر دیر کے ریحان اللہ نے بالترتیب پہلی، دوسری اور تیسری انعام کے حقدار ٹھہرے۔اورانگریزی تقریری مقابلے میں تنزیل الرحمٰن – جی سی ایم ایچ ایس (بوائز) چترال پہلی، محمد حارث علامہ اقبال ماڈل اسکول دیر اپر دوسری اور سعد الرحمٰن – جی ایچ ایس عشریت،چترال تیسری پوزیشن اپنے نام کرلی ۔اس موقع پر اے ڈی ای او اسپورٹس اکبر حسین ، سیکرٹری انٹر اسکول اسپورٹس اینڈ لیٹریری مقابلہ 2025 و وائس پرنسپل جی سی ایم ایچ ایس (بوائز) چترال شاہد جلال ،پرنسپل آنیس الرحمن اوردوسروں نے کہاکہ انٹر اسکول لیٹریری مقابلہ 2025 ڈویژنل سطح چترال لوئر کا تاریخی دن ہے ،چترال کی تاریخ میں آج کا دن ہمیشہ سنہرے حروف سے لکھا جائے گا، جب پہلی مرتبہ چترال لوئر کو یہ اعزاز حاصل ہوا کہ اس نے ڈویژنل سطح کے انٹر اسکول لیٹریری مقابلہ 2025 کی میزبانی کی۔ اس شاندار تقریب میں چاروں اضلاع چترال اپر، چترال لوئر، دیر اپر اور دیر لوئرکے باصلاحیت طلبہ نے شرکت کی اور نعت، اردو تقریر اور انگلش تقریر کے مواقع پر اپنی فصاحت، روانی اور اعتماد کا بھرپور اظہار کیا۔چاروں اضلاع سے آئے ہوئے اساتذہ، سربراہانِ مدارس اور طلبہ کی شرکت نے اس پروگرام کو ایک یادگار اور رنگا رنگ تعلیمی جشن بنا دیا۔






