تجار یونین اپر چترال کی کال پر فلسطین کے مظلوم مسلمانوں کے ساتھ اظہار یکجہتی کے سلسلے میں اپر چترال کے تمام کاروباری مراکز بند رہے

پاکستان ٹریڈ فیڈریشن اور ٹریڈ فیڈریشن ملاکنڈ ڈویژن کے اعلان کے تحت اپر چترال میں بھی مظلوم فلسطینیوں کے ساتھ اظہار یکجہتی کے سلسلےمیں جملہ کاروباری مراکز میں شٹر ڈاون ہڑتال کی گئی۔ اس سلسلے میں بونی بازار کے علاوہ ریشن بازار، موڑکھو بازار، مستوج بازار اور ملحقہ تجارتی مراکز بھی مکمل طور پر شٹر ڈاون کرکے دنیا کو یہ پیغام دیا گیا کہ تجار برادری جہاں بھی ہے، اپنے مظلوم فلسطینی بھائیوں کے دکھ درد کو محسوس کر رہی ہے اور اپنی اس ہڑتال کے ذریعے عالمی قوتوں سے پرزور مطالبہ کرتی ہے کہ اسرائیل کی ظلم و جبر اور بربریت کو روکا جائے۔ بونی میں صدر رحیم خان کی قیادت میں ریلی کا بھی انعقاد کیا گیا اور بینر اٹھاتے ہوئے غاصب اسرائیلی حکومت کے خلاف واشگاف نعرہ بازی کی گئی۔ ریلی میں تجار برادری کے علاوہ مختلف طبقاتِ فکر کے لوگوں نے بھی شرکت کی۔ اس موقع پر بازار یونین کے صدر رحیم خان، سینئر نائب صدر محمد اسلام، نائب صدر افسر علیم ، سابق صدر محمد شفیع اور سابق جنرل سکرٹری نوروز علیشاہ نے خطاب فرماتے ہوئے شدید الفاظ میں اسرائیلی غاصب حکومت کے سفاکانہ کردار کی مذمت کی۔ انہوں نے عالمی دنیا اور عالم اسلام سے فعال کردار ادا کرنے کا مطالبہ کیا۔ مقررین نے فلسطینیوں کی نسل کشی کو روکنے کے لیے فوری اقدامات کی ضرورت پر زور دیا۔ بعد میں پریس کلب اپر چترال کے نمائندے کو انٹرویو دیتے ہوئے صدر، سینئر نائب، نائب صدر، سابق صدر اور دیگر نے تجار برادری سے اسرائیلی مصنوعات کی مکمل بائیکاٹ کرنے کی اپیل کی۔ صدر تجار یونین رحیم خان نے شٹر ڈاون ہڑتال کو 100% کامیاب بنانے پر بازار بونی کے جملہ کاروباری حضرات، بازار ریشن، مستوج، موڑکھو اور ملحقہ علاقہ جات کے تاجروں کا خصوصی شکریہ ادا کرتے ہوئے کہا کہ اسرائیلی جارحیت کے خلاف تاجر برادری کی مثالی اتحاد سے ثابت ہوا کہ تاجر برادری ہر حساس مسئلے پر ایک صفحے پر ہوتی ہے اور اپر چترال کے سارے تاجر ہر اجتماعی مسئلے پر ایک دوسرے کے دست و بازو بن جاتے ہیں۔