چترال بونی روڈ گزشتہ سال کام کی بندش کے بعد لاوارث بن کررہ گئی ہے جس کاکوئی والی ووارث نہیں جس سے سڑک کی حالت انتہائی مخدوش ہوکررہ گئی ہے

چترال (نمائندہ ) چترال بونی روڈ گزشتہ سال کام کی بندش کے بعد لاوارث بن کررہ گئی ہے جس کاکوئی والی ووارث نہیں جس سے سڑک کی حالت انتہائی مخدوش ہوکررہ گئی ہے اور چترال سے بونی کا سفر اب چار گھنٹوں میں بھی طے نہیں ہوسکتا۔ ریشن اور گرین لشٹ کے درمیان واقع پہاڑی میں مستوج روڈ پر گزشتہ دو ماہ سے ملبہ پڑا ہوا ہے، جس کے باعث یہ سڑک شدید خطرناک ہو چکی ہے۔ مقامی افراد اور مسافر اس صورتِ حال سے شدید پریشان ہیں، لیکن متعلقہ حکام کی جانب سے تاحال کوئی خاطر خواہ اقدامات نہیں کیے گئے۔ ملبے کی موجودگی کے باعث سڑک کی چوڑائی کم ہو گئی ہے، جس سے گاڑیوں کی آمدورفت میں شدید مشکلات پیش آ رہی ہیں۔ اس مقام پر راستہ اتنا تنگ ہو چکا ہے کہ دو گاڑیوں کا ایک ساتھ گزرنا ممکن نہیں ہے، آور اس مقام پرخطرناک موڑ بھی ہے۔
مقامی افراد کا کہنا ہے کہ انہوں نے متعدد بار متعلقہ محکموں کو اس مسئلے سے آگاہ کیا، لیکن ابھی تک کوئی عملی اقدامات نہیں کیے گئے۔ اگر فوری طور پر راستے سے ملبہ نہ ہٹایا گیا تو کسی بڑے حادثے کا خدشہ ہے۔ اس سڑک پر روزانہ سینکڑوں گاڑیاں سفر کرتی ہیں، اور کسی بھی وقت کوئی ناخوشگوار واقعہ پیش آ سکتا ہے۔ مقامی آبادی اور مسافروں نے حکومت سے مطالبہ کیا ہے کہ جلد از جلد سڑک کی صفائی کے لیے ضروری اقدامات کیے جائیں تاکہ کسی بڑے حادثے سے بچا جا سکے۔اگر فوری کارروائی نہ کی گئی تو نہ صرف انسانی جانوں کو خطرہ لاحق ہوگا بلکہ مستوج اور دیگر علاقوں سے چترال تک سفر کرنے والے ہزاروں لوگوں کو مشکلات کا سامنا کرنا پڑے گا۔