لوئر چترال انتظامیہ کی طرف سے ایسٹر تہوار کے موقع پر چترال کی مسیحی برادری کے لیے ضلعی تحائف اور فوڈ پیکج تقسیم

چترال ( نیوز ) ضلعی انتظامیہ لوئر چترال نے حسب سابق امسال بھی مسیحی برادری کے معروف تہوار ایسٹر کے موقع پر تحائف اور فوڈ پیکیج تقسیم کی ہے ، ڈپٹی کمشنر لوئر چترال کے احکامات کی روشنی میں اسسٹنٹ کمشنر لوئر چترال محمد افتاب منیر نے چرچ جا کر میسحی برادری سے ملاقات کی ۔ ان کے تہوار کی خوشیوں میں شامل ہوۓ اور مبارک باد دی۔ اور ملک کی ترقی کے لیے مسیحی برادری کے کردار کو سراہا۔
انہوں نے کہا ہے کہ ضلعی انتظامیہ چترال مسیحی برادری کی خوشیوں میں برابر کی شریک ہے. پاکستان میں تمام اقلیتوں کو بحیثیت شہری ہر قسم کے مساوی حقوق حاصل ہیں، ہمارا مذہب اسلام اقلیتوں کو مساوی حقوق دینے کا درس دیتا ہے اور ہمارا آئین انہیں اپنی مذہبی عبادات، رسومات اور تہواروں کو پوری آزادی سے منانے کی ضمانت دیتا ہے۔ صوبے میں بسنے والی اقلیتی برادری کی فلاح و بہبود، ان کی جان و مال اور آئینی حقوق کا تحفظ موجودہ صوبائی حکومت کی ترجیحات میں شامل ہے جس کو یقینی بنانے کے لئے ترجیحی بنیادوں پر اقدامات اٹھائے جائیں گے۔ملک کی تعمیر و ترقی میں مسیحی برادری کا بھر پور کردار رہاہے جسے پوری قوم قدر کی نگاہ سے دیکھتی ہے۔ اسسٹنٹ کمشنر نے اس بات پر زور دیا کہ موجودہ ملکی و عالمی صورتحال اس بات کا تقاضا کرتی ہے کہ ہر سطح پر بین المذاہب ہم آہنگی کو فروغ دیا جائے۔
اس موقع پر مسیحی برادری کے پیشوا وں اور عمائدین حکومت اور ضلعی انتظامیہ چترال کے طرف سے تہوار کی مبارکباد دینے اور انہیں تحفے تحائف دینے پر شکریہ ادا کیا ۔ اور خصوصا چترال کے لوگوں کے بھائی چارے اور محبت کی تعریف کی