برفانی چیتے کی موجودگی کے حوالے سے آگاہی فراہم کرنے کے لئے ڈبلیو ڈبلیو ایف اور ایس ایل ایف ٹیم کاگرم چشمہ کا دورہ
چترل(نامہ نگار)ڈپٹی کمشنر لوئر چترال کی ہدایات پر چترال وائلڈ لائف ڈویژن کے افسران اور فیلڈ سٹاف نے سنو لیپرڈ فاؤنڈیشن کی ٹیم کے ہمراہ گرم چشمہ کا دورہ کیا، جس کا بنیادی مقصد مقامی کمیونٹی کو جنگلی حیات کے تحفظ، خصوصاً سنو لیپرڈ / برفانی چیتے کی موجودگی کے حوالے سے آگاہی فراہم کرنا تھا۔دورے کے دوران ٹیم نے مقامی آبادی کو تفصیل سے آگاہ کیا کہ اگر سنو لیپرڈ یا اس کے نشانات علاقے میں دیکھے جائیں تو کن فوری، ضروری اور محفوظ اقدامات کو اختیار کرنا چاہیے اور کن امور سے مکمل اجتناب لازمی ہے۔ ساتھ ہی ممکنہ خطرات کی صورت میں قانونی، ذمہ دارانہ اور محفوظ ردِعمل کے درست طریقہ کار پر بھی رہنمائی فراہم کی گئی۔
مزید برآں، ٹیم نے مال مویشیوں کو جنگلی جانوروں کے ممکنہ حملوں سے محفوظ رکھنے کے لیے مؤثر حفاظتی اور احتیاطی تدابیر پر بھی روشنی ڈالی۔ کمیونٹی کو سنو لیپرڈ کی ماحولیاتی اہمیت، پہاڑی ماحولیاتی نظام کے توازن میں اس کے کلیدی کردار، اور فلیگ شپ اسپیشیز کے تحفظ کے وسیع مثبت اثرات سے بھی مفصل آگاہی دی گئی، تاکہ مقامی سطح پر جنگلی حیات کے تحفظ میں عملی تعاون کو مزید مستحکم کیا جا سکے۔
