نیسپاک کے آفیسران کا آیون گول نالے کے سنگم میں جاری کام کا جائزہ ، ٹھیکہ دار کو بڑے پتھر ہٹانے کیلئے ہیوی مشینری موقع پر پہنچانے کی ہدایت ،

چترال (نامہ نگار) آیون گول اور دریائے چترال کے سنگم "اموشتھوغ ” میں سیلاب اور دریائی طغیانی سے جمع شدہ بڑے بڑے پتھروں سے بنے مصنوعی ڈیم کی دیوار کو ہٹانے اور دریائے چترال کا راستہ صاف کرنے کیلئے چنیلائزیشن کا کام جاری ہے ، جس کا جائزہ لینے کیلئے نیسپاک کے آفیسران نے ہفتے کے روز آیون قصبے کے بالمقابل مین روڈ ” دولدینی ” سے کام کا نظارہ کیا ، اس موقع پر گوہر علی پروگرام منجیر نیسپاک کمپنی پشاور، فضل فاروق ریذیڈنٹ انجینر نیسپاک کمپنی، الطاف پی ایم ٹو ٹھیکہ دار، زین اعظم اور چیرمین ویلج کونسل آیون۔ ون وجیہ الدین موجود تھے ، چیرمین وجیہ الدین نے اس موقع نیسپاک کے آفیسران کی کام دلچسپی لینے پر ان کا شکریہ ادا کیا ، اور کام کو مزید توسیع دینے اور بہتر کرنے کیلئے ہیوی مشینری استعمال کرنے کی درخواست کی ۔ جس پر نیسپاک کے آفیسران نے متعلقہ ٹھیکہ دار کو ہیوی مشینری موقع پر پہنچانے اور کام کرنے کے ہدایات جاری کیں ۔
واضح رہے ، کہ 2015 میں مسلسل ایک مہینے آیون گول میں آنے والے شدید سیلاب نے بڑے بڑے دیو ہیکل پتھروں کو آیون سنگم میں جمع کیا تھا ۔ جس کی وجہ سے دریاء مصنوعی ڈیم میں تبدیل ہو گئی ۔ اور آیون کے کئی مکانات سمیت وسیع رقبہ پانی میں ڈوب گیا تھا ، تاہم بعد میں ہنگامی بنیادوں پر ڈیم کھول دیا گیا ۔ لیکن کام مکمل ہونے سے پہلے ہی دریاء کے بہاؤ میں اضافہ ہوا ۔ اور کام مکمل نہ ہوسکا۔ جس کے بعد دریاء کی سطح مسلسل بلند ہورہی ہے ۔ اور آیون کا وسیع ایریا درجنوں مکانات دریا برد ہو چکے ہیں ، یا دریا بردگی کے شدید خطرے سے دوچار ہیں ۔ جس کی بنیادی وجہ سنگم پر جمع ہونے والے بڑے بڑے پتھر ہیں ، جو دریا کے بہاؤ کا راستہ روکے ہوئے ہیں ۔