دیر موٹروے منصوبے کے لیے درکار تمام وسائل صوبائی حکومت فراہم کرے گی وزیر اعلیٰ خیبر پختونخوا محمد سہیل آفرید

وزیر اعلیٰ خیبر پختونخوا محمد سہیل آفریدی نے سوات موٹروے فیز ٹو پر تعمیراتی کام جلد شروع کرنے کی ہدایت کرتے ہوئے کہا ہے کہ سوات موٹروے فیز ٹو صوبائی حکومت کا فلیگ شپ منصوبہ ہے اور اس کی مقررہ مدت میں تکمیل کے لیے تمام وسائل ترجیحی بنیادوں پر فراہم کیے جائیں گے۔ وزیر اعلیٰ نے منصوبے سے متعلق تکنیکی امور فوری طور پر حل کرنے کی بھی ہدایت کی۔ وزیر اعلیٰ نے روڈ سیکٹر کے فلیگ شپ منصوبوں سے متعلق ایک اہم اجلاس کی صدارت کرتے ہوئے پشاور تا ڈی آئی خان موٹروے منصوبے کا جلد سنگ بنیاد رکھنے کا عندیہ دیا اور متعلقہ حکام کو ضروری ہوم ورک فوری مکمل کرنے کی ہدایت کی۔ اجلاس میں سوات موٹروے فیز ٹو، پشاور ڈی آئی خان موٹروے اور دیر موٹروے منصوبوں پر پیش رفت کا تفصیلی جائزہ لیا گیا۔ اجلاس میں دیر موٹروے کو مکمل طور پر صوبائی وسائل سے تعمیر کرنے کا اصولی فیصلہ کرتے ہوئے منصوبے پر عملی کام کے آغاز کے لیے تمام قانونی اور انتظامی تقاضے تیز رفتاری سے مکمل کرنے کی ہدایت کی گئی۔ وزیر اعلیٰ نے اجلاس سے خطاب کرتے ہوئے کہا کہ پشاور ڈی آئی خان موٹروے اور سوات موٹروے فیز ٹو پبلک پرائیویٹ پارٹنرشپ ماڈل کے تحت تعمیر کیے جا رہے ہیں۔ دیر موٹروے منصوبے کے لیے درکار تمام وسائل صوبائی حکومت فراہم کرے گی۔ اجلاس کو بریفنگ دیتے ہوئے بتایا گیا کہ 80 کلومیٹر طویل سوات موٹروے فیز ٹو چکدرہ انٹرچینج سے فتح پور تک تعمیر کیا جا رہا ہے، جس پر نو انٹرچینجز اور دریائے سوات کے مختلف مقامات پر سات پل تعمیر کیے جائیں گے۔ بریفنگ میں مزید بتایا گیا کہ پشاور ڈی آئی خان موٹروے 365 کلومیٹر طویل ہے، جس پر 19 انٹرچینجز اور دو ٹنلز تعمیر کی جائیں گی۔ وزیر اعلیٰ نے کہا کہ صوبائی حکومت دور افتادہ علاقوں کے عوام کی ترقی اور خوشحالی پر خصوصی توجہ دے رہی ہے اور اس مقصد کے لیے دستیاب وسائل کے مو¿ثر اور شفاف استعمال کو یقینی بنایا جا رہا ہے۔ اجلاس میں چیف سیکرٹری خیبر پختونخوا شہاب علی شاہ، ایڈیشنل چیف سیکرٹری پلاننگ اینڈ ڈویلپمنٹ اکرام اللہ، سیکرٹری خزانہ، سیکرٹری سی اینڈ ڈبلیو اور دیگر متعلقہ حکام نے شرکت کی