تازہ ترین
اپر چترال ضلعی انتظامیہ کے زیرِ اہتمام افواجِ پاکستان اور قانون نافذ کرنے والے اداروں سے اظہارِ یکجہتی کے لیے پروقار تقریب
اپر چترال/ضلعی انتظامیہ اپر چترال کے زیرِ اہتمام وطنِ عزیز پاکستان کی سلامتی، امن اور استحکام کے لیے افواجِ پاکستان، پولیس، چترال لیویز اور دیگر قانون نافذ کرنے والے اداروں کی لازوال قربانیوں کو خراجِ تحسین پیش کرنے کے لیے ایک خصوصی پروگرام کا انعقاد کیا گیا۔ تقریب میں لائن ڈیپارٹمنٹس، ٹریڈ یونین اور ٹرانسپورٹ یونین کے عہدیداران سمیت عوام کی بڑی تعداد نے شرکت کر کے فورسز کے ساتھ مکمل یکجہتی کا اظہار کیا۔ تقریب کی صدارت ڈپٹی کمشنر اپر چترال محمد عمران خان نے کی۔ اس موقع پر ضلعی انتظامیہ کے افسران، محکمہ پولیس کے حکام، مختلف محکموں کے نمائندگان اور سماجی شخصیات نے شرکت کی۔
مقررین نے اپنے خطابات میں کہا کہ افواجِ پاکستان اور دیگر سیکیورٹی اداروں کی بدولت ہی آج ہم آزاد فضاؤں میں سانس لے رہے ہیں۔ انہوں نے اس عزم کا اعادہ کیا کہ پوری قوم اپنے محافظ اداروں کے شانہ بشانہ کھڑی ہے اور کسی بھی قربانی سے دریغ نہیں کرے گی۔ڈپٹی کمشنر اپر چترال محمد عمران خان نے شرکاء سے خطاب کرتے ہوئے کہا کہ افواجِ پاکستان، پولیس اور چترال لیویز کے بہادر جوان مختلف محاذوں پر دشمن کا مقابلہ کرتے ہوئے اپنی جانوں کا نذرانہ پیش کر رہے ہیں۔ ان کی یہ قربانیاں وطن کی بقا اور سلامتی کی ضمانت ہیں۔
انہوں نے دشمن ممالک کو للکارتے ہوئے مزید کہا کہ پاکستان کے دفاع اور استحکام کے لیے بچہ بچہ تیار ہے اور آنے والی نسلیں بھی اپنے قومی اداروں کے ساتھ متحد رہیں گی۔ انہوں نے واضح کیا کہ کسی بھی قسم کی بیرونی سازش یا چیلنج کا مقابلہ قومی یکجہتی کے ساتھ کیا جائے گا۔
پروگرام کے اختتام پر ملک و قوم کی سلامتی، شہداء کے درجات کی بلندی اور ملک میں پائیدار امن کے لیے خصوصی دعا کی گئی۔ شرکاء نے “پاکستان پائندہ باد” اور “پاک فوج زندہ باد” کے نعروں سے فضا کو گرما دیا
