"زخمی تھے شاؤ تازہ بوئے،پولوئیدو ناشونو تن بوئے”۔ کھوارو بزرگ صوفی شاعر باباسیرو ہیہ کڑوم ہر ایوالیو ہردئی گوئے، و ا اکثرو لیگینیہ دی گوئے کیہ وت کہ پرانو زخمی یا پولوئیدوو پوشیتانی۔ ہے قسمہ "ریشنو بوم رنگ گنی شیر مہ ژانو یاقوت شوناری”ہمیشہ مہ یادی گوئے کیہ وت کہ نوگراموتے بوغاوا گیاوا ریشنو موژین پھار نیسیتام۔ "جو بس شوگرامی بیتی، ریشنوتے کہ گوس کیانی بوئے” باباسیرو ہیہ کڑوم دی بار بار شونہ گوئے کیہ وت کہ کوس تان دیہوتے مشکین ہوئے۔ "پیٹیکو موڑا تہ کتاب بوئے "نوغ زماناعبدالحیات شاہ صاحبو ہیہ کڑوم یا "سکولوتے بینان مہ ژانو یاران”وا ہشتان چقہ "مہ گلاسہ اوغ ٹپ کو نوبویان” ہر کوس لیگینیہ گونی۔ بمبوریتو ملنگو "تہ بیخ نیسیکو یارا”ہر چیقوچے لوٹو، عورتو چے کولانو، عالمو چے عامیو ہر کوس لیگینیہ میخ بیتی بہچی شیر۔
کھوار زبانو بلبل اقبال الدین سحر و شاعریو ای نویوکو خصوصیت ہیہ کہ ہورو شاعریو ہر جوؤ شعر وکہ گانین ہوئے، ہیس ضرب المثل یا محاورہ ساوز بیتی شیر۔ کیچہ کہ اردو زبا نہ اقبالو چے مرزا غالب ہتے شاعر اسونی کہ ہیتان اکثر شعر ضرب المثل یا محاورہ ساوز بیتی شینی، کھوار ا اقبال الدین سحرو تے ہیہ اعزاز حاصل شیرکہ ہمونیہ پت کھوار شاعران موژی ہورو کڑوم سفو سار ذیات ضرب المثل یا محاورہ ساوز بیتی عام بول چالو حصہ ساوز بیتی شینی۔ سوشل میڈیا پلیٹ فارم فیس بکہ کا کہ گمبوریان موژو نیشی تصویرو شئیر اریر یا کوس ہوستہ گمبوری کہ پوشین ہوئے تھے ہر ایوالی ہموش کمنٹ کوروئے کہ تو تان گمبوری خور گمبوریو کیہ کوس۔ "سحر دی ناگہان ہیہ محفلہ شامل” ہرونی مشہور بیتی شیرکہ ہورو پورا شاعری ای ووشکی وا ہیہ مٖصرعہ ای ووشکی۔ سحر و شاعری ذیادہ سہل ممتنع وا ہورو ہر ای کڑوم ضرب المثل بیکو بش۔ روزمرہ زندگیو ہر ای موقعو سوم سحر و کیہ نہ کیہ کڑوم مطابقت لاکھوئے۔
وختو کمیو پروشٹہ لاکھی سحرو ای کمہ شعران ذکرو کورومان کیا غ کہ ضرب المثل ساوز بیتی کھوارزبانو ہش حصہ ساوز بیتی شینی کہ کھوار زبان شیکہ پت ہیتان کا روخچیکو نو بوئے۔
اے مہ حسنو گمبوری تہ یادی گویانو ، دنیا ر بے زار، قیامتو انتظار ، مہ نسین کوری بیسان ووریو گنی، انسانو ہر دیو قرار نکی، کیہ کہ خوشانی تہ بچین ژانہ شیر، شرابو پی ژارئیے، ایمانو دی الئے اسوس، کیہ چارہ مہ سوم نکی اللہو تے کوم حوالہ، فریبو نام مو بہچار قسمتو عدالتہ، ہردیو پروشٹہ عقلو شکست ضرور، ہیہ ہتے انگار کہ چوکی شیر تنار، دل گرفتہ مہ ارو وا خور کیا غ مہ کوروس، گہی اوقات در شوغور گہی در راہ حجازی، قسمتو فیصلہ رے گمان کوری اسوم،
عشقو ازالہ تن شیر بو قربانی، کیچہ مراز اے مہ ژان ہردیو راز، گہی کوئے غمگین گہی خوشان کوئے، مہ سوم ملگیری اوشوئے مہ تان ستھار۔
سحر صاحبو رومانوی شاعریا بو ذیاد تعدادا ضرب المثل ساوز بیتی ہردیو تاران رونزیکہ مجبور کونیان مثلاً گئے لہ مہ ژان ہردیو سورین تو کوسی،
تہ پرچم شہ کھوٹو غون پنجرش مسو تے پچھان،
گلستانہ ویرانی شیر تہ پوشی سف اژونی،
