چترال میں خزان رنگ کی موج مستیوں میں اضافہ کرتے ہوئے ضلعی انتظامیہ نے Winds Eagle کے نام سے چترال جنالی میں تین روزہ پولو ٹورنامنٹ کا آغاز
چترال (نمائندہ ) چترال میں خزان رنگ کی موج مستیوں میں اضافہ کرتے ہوئے ضلعی انتظامیہ نے Winds Eagle کے نام سے چترال جنالی میں تین روزہ پولو ٹورنامنٹ کا آغاز کردیا جس میں اسے ڈسٹرکٹ اسپورٹس آفس کی معاونت حاصل ہے۔ ٹورنامنٹ کا باقاعدہ افتتاح منگل کے روز ہو ا جس میں کمانڈنٹ چترال سکاوٹس کرنل بلال جاوید مہمان خصوصی تھے جبکہ ڈی سی لویر چترال محسن اقبال، ڈی پی او لویر چترال افتخار شاہ، تحصیل چیرمین چترال شہزادہ امان الرحمن، خطیب شاہی مسجد مولانا خلیق الزمان اور ڈسٹرکٹ یوتھ افیسر سردار علی وزیر بھی افتتاحی تقریب کی رسومات ادا کئے۔ ٹورنامنٹ میں کل چھ پولو ٹیمیں حصہ لے رہی ہیں جبکہ فائنل میچ جمعرات کے شب فلڈ لائٹ میں کھیلا جائے گا جوکہ چترال میں اپنی نوعیت کاپہلا ایونٹ ہوگا۔ اپنے خطاب میں ڈی سی محسن اقبال نے کہاکہ پولو چترال کی ثقافت کا بنیادی جزو ہے جس کی ترقی میں ضلعی انتظامیہ نے کوئی کسر نہیں چھوڑی ہے اور اس ایونٹ کی انعقاد کا مقصد بھی نوجوان کھلاڑیوں کو اس سیزن میں اپنی صلاحیتوں کو نکھارنے کا موقع فراہم کرنے کے ساتھ ساتھ ٹورزم کی ترقی ہے جبکہ ڈسٹرکٹ اسپورٹس آفس اور ڈسٹرکٹ یوتھ آفس نوجوانوں کو صحت مند مشاعل کے مواقع فراہم کرنے میں دن رات کوشان ہیں۔ ٹورنامنٹ کی افتتاحی تقریب میں پولو کی شائقین نے کثیر تعداد میں شرکت کی۔ تاہم پولو ایسوسی ایشن چترال کے عہدیداران اس تقریب میں موجود نہیں تھے۔
