یونیورسٹی آف چترال میں پاکستان بیت المال سکالر شپ کی تقسیم کی تقریب کا انعقاد

چترال(بشیرحسین آزاد )یونیورسٹی آف چترال میں پاکستان بیت المال کے وظائف کی تقسیم کی تقریب منعقد ہوئی۔ تقریب کی نظامت پروفیسر ڈاکٹر حاضراللہ (وائس چانسلر) نے کی۔ وائس چانسلر نے ڈاکٹر تاج الدین (پرووسٹ)، ڈاکٹر محمد ارشاد، رجسٹرار، ڈاکٹر ثناء اللہ، کنٹرولر امتحان، ڈاکٹر نظام-ڈائریکٹر اکیڈمکس اور ڈاکٹر ندیم-ڈائریکٹر ایڈمنسٹریشن کے ساتھ مل کر یونیورسٹی کے 75 مستحق طلباء میں اسکالرشپ کے چیکس کی پہلی قسط تقسیم کی۔

وائس چانسلر، پروفیسر ڈاکٹر حاضراللہ نے مستحق طلبہ کو بغیر کسی رکاوٹ کے اپنی تعلیم جاری رکھنے کے لیے مالی امداد کی اہمیت پر روشنی ڈالی۔ انہوں نے پسماندہ طبقات میں اعلیٰ تعلیم کے فروغ کے لیے پاکستان بیت المال کے کردار کو سراہا۔ انہوں نے منیجنگ ڈائریکٹر پاکستان بیت المال سینیٹر کیپٹن شاہین خالد بٹ اور ڈاکٹر لعل بادشاہ ڈائریکٹر پاکستان بیت المال پراونشل آفس پشاور کا یونیورسٹی آف چترال کے ساتھ تعاون کرنے پر خصوصی شکریہ ادا کیا۔ شرکاء سے خطاب کرتے ہوئے وائس چانسلر نے اس بات پر زور دیا کہ اس طرح کے اقدامات نہ صرف طلباء پر مالی بوجھ کم کرتے ہیں بلکہ انہیں تعلیمی لحاظ سے آگے بڑھنے کی ترغیب بھی دیتے ہیں۔ استفادہ کنندگان نے تعاون کے لیے اظہار تشکر کرتے ہوئے کہا کہ اسکالرشپس ان کے تعلیمی اہداف کو حاصل کرنے میں نمایاں مدد کریں گی۔