ڈی پی او لوئر چترال ریشم جہانگیر کا وادی بمبوریت اور پولیس اسٹیشن رمبور کا دورہ، بین المذاہب ہم آہنگی، سیاحوں کے تحفظ اور امن و امان پر زور
چترال/ڈسٹرکٹ پولیس آفیسر لوئر چترال ریشم جہانگیر نے وادی بمبوریت اور پولیس اسٹیشن رمبور کا دورہ کرتے ہوئے کیلاش اور سنی برادری کے عمائدین سے اہم ملاقات کی، جبکہ پولیس اسٹیشن رمبور میں سیکیورٹی، انتظامی امور اور پولیس کارکردگی کا بھی تفصیلی جائزہ لیا۔
وادی بمبوریت میں منعقدہ اجلاس میں ایس ڈی پی او سرکل بمبوریت حسن اللہ، سابق مشیر وزیر اعلیٰ برائے اقلیتی امور وزیرزادہ، ایس ایچ او تھانہ بمبوریت سب انسپکٹر رحیم بیگ، کیلاش اور سنی برادری کے معزز عمائدین نے شرکت کی۔
اس موقع پر ڈی پی او ریشم جہانگیر نے کہا کہ لوئر چترال امن، مذہبی رواداری اور قدرتی حسن کی وجہ سے دنیا بھر کے سیاحوں کی توجہ کا مرکز ہے، اس لیے ملکی و غیرملکی سیاحوں کو محفوظ، پُرامن اور دوستانہ ماحول فراہم کرنا چترال پولیس کی اولین ترجیح ہے تاکہ وہ خوشگوار یادوں کے ساتھ واپس جائیں۔
انہوں نے کہا کہ ضلع بھر میں منشیات فروشوں کے خلاف بلاامتیاز کارروائیاں مزید تیز کی جا رہی ہیں تاکہ نوجوان نسل کو اس ناسور سے محفوظ رکھا جا سکے۔ انہوں نے کم عمر ڈرائیوروں کے خلاف جاری خصوصی مہم کا بھی ذکر کرتے ہوئے کہا کہ ٹریفک قوانین پر سختی سے عمل درآمد اور والدین کے تعاون سے قیمتی انسانی جانوں کا تحفظ یقینی بنایا جائے گا۔
اجلاس میں کیلاش اور سنی برادری کے عمائدین نے ڈی پی او کی عوام دوست پالیسی، منشیات کے خلاف مؤثر اقدامات، کم عمر ڈرائیوروں کے خلاف مہم، سیاحوں کے تحفظ کے لیے کیے گئے انتظامات اور بین المذاہب ہم آہنگی کے فروغ کے عزم کو سراہتے ہوئے چترال پولیس کے ساتھ ہر ممکن تعاون کی یقین دہانی کرائی۔
قبل ازاں ڈی پی او لوئر چترال نے پولیس اسٹیشن رمبور کا تفصیلی دورہ کیا، جہاں انہوں نے تھانے کی سیکیورٹی، روزنامچہ، زیرِ تفتیش مقدمات، حوالات، ریکارڈ اور دیگر انتظامی امور کا معائنہ کیا اور افسران و اہلکاروں کی کارکردگی کا جائزہ لیا۔
ڈی پی او ریشم جہانگیر نے اس عزم کا اظہار کیا کہ پولیس افسران و اہلکار ایمانداری، دیانتداری اور پیشہ ورانہ مہارت کے ساتھ اپنے فرائض انجام دیں تاکہ عوام کا پولیس پر اعتماد مزید مستحکم ہو اور ضلع بھر میں امن و امان کی فضا برقرار رہے۔
