دکھ اور آزمائش کے لمحات میں الخدمت فاؤنڈیشن سری لنکن عوام کیساتھ ہے۔ذمہ داران جلدمتاثرہ علاقوں کادورہ کریں گے،ڈاکٹرحفیظ الرحمن  

راولپنڈی( نامہ نگار ) سری لنکا میں تباہ کن سیلاب کے حوالے سے الخدمت فاؤنڈیشن پاکستان کا ہنگامی اجلاس مرکزی صدر پروفیسر ڈاکٹر حفیظ الرحمٰن کی زیرصدارت منعقد ہوا۔ الخدمت ڈیزاسٹر مینجمنٹ کے چئیرمین اعجاز اللہ خان نے اجلاس کو تفصیلات بتاتے ہوئے کہا کہ سری لنکا میں گزشتہ کئی روز سے جاری شدید بارشوں نے تباہ کن سیلاب اور لینڈ سلائیڈنگ کو جنم دیا ہے، جس کے نتیجے میں بڑے پیمانے پر جانی و مالی نقصان سامنے آیا ہے۔ سرکاری و امدادی اداروں کے مطابق اب تک 123 سے زائد افراد جاں بحق اور تقریباً 130 افراد لاپتہ ہیں جبکہ 44 ہزار سے زیادہ متاثرہ افراد کو عارضی پناہ گاہوں میں منتقل کیا گیا ہے۔ لینڈ سلائیڈنگ نے گھروں، سڑکوں، رابطہ راستوں اور زرعی زمینوں کو شدید نقصان پہنچایا ہے۔ ہنگامی جائزوں کے مطابق متاثرہ آبادی کو اس وقت خیموں، ترپالوں، ادویات، صاف پانی، خشک خوراک، کمبلوں اور فوری طبی امداد کی سب سے زیادہ ضرورت ہے۔ اجلاس میں سری لنکا میں ہونے والی تباہی پر گہرے رنج و غم کا اظہار کیا گیا اور جاں بحق ہونے والوں کے لیے دعا کی گئی۔ڈاکٹر حفیظ الرحمٰن  نے اجلاس میں فیصلہ کیا کہ الخدمت فاؤنڈیشن مشکل کی اس گھڑی میں سری لنکن عوام کو تنہا نہیں چھوڑے گی اور فوری طور پر ریلیف سامان کی ایک کھیپ این ڈی ایم اے اور حکومت پاکستان کے تعاون سے پاکستان سے سری لنکا روانہ کرے گی۔ اس کھیپ میں خیمے، ترپالیں، ادویات، کمبل اور دیگر بنیادی اشیائے ضرورت شامل ہوں گی تاکہ متاثرہ خاندانوں کی فوری ضروریات پوری کی جاسکیں۔اس موقع پر صدر الخدمت نے بتایا کہ وہ خود یا کوئی اور ذمہ دار بھی جلد سری لنکا کا دورہ کریں گے جہاں وہ ریلیف سرگرمیوں کا جائزہ لیں گے اور امدادی کاموں میں براہِ راست حصہ لیں گے۔ پروفیسر ڈاکٹر حفیظ الرحمٰن نے کہا کہ دکھ، آزمائش اور مشکلات کے ان لمحات میں الخدمت فاؤنڈیشن سری لنکن عوام کے ساتھ کھڑی ہے۔ ہم انہیں ہرگز تنہا نہیں چھوڑیں گے اور انسانی بنیادوں پر ہر ممکن تعاون جاری رکھیں گے۔