چترال: جماعت اسلامی ملک کی واحد جماعت ہے جہاں کارکن خود مالی قربانی دیتے ہیں، وجیہہ الدین
چترال(چترال ایکسپریس)جماعت اسلامی لوئر چترال کے امیر وجیہہ الدین نے کہا ہے کہ جماعت اسلامی ملک کی واحد سیاسی و مذہبی جماعت ہے جہاں کارکنان پارٹی کو چلانے کے لیے خود مالی قربانی دیتے ہیں، جبکہ اس کے برعکس دیگر سیاسی جماعتوں میں کارکنوں کو پارٹی کے ساتھ جوڑے رکھنے کے لیے اقتدار کے دوران رشوت اور مراعات سے نوازا جاتا ہے۔ یہی وجہ ہے کہ جماعت اسلامی مخلصانہ طور پر اس دھرتی پر اللہ کے دین کے نفاذ اور اسلامی انقلاب کے لیے جدوجہد کر رہی ہے۔ان خیالات کا اظہار انہوں نے چترال کے ایک مقامی ہوٹل میں منعقدہ ’ڈونرز کانفرنس‘ سے بطور مہمانِ خصوصی خطاب کرتے ہوئے کیاامیرِ ضلع وجیہہ الدین نے اپنے خطاب میں کہا کہ جماعت اسلامی کے کارکنان اور حتیٰ کہ وہ عام لوگ بھی جو جماعت سے باقاعدہ وابستہ نہیں ہیں، وہ دل کھول کر اس جماعت کو فنڈز دیتے ہیں۔ انہوں نے واضح کیا کہ:
”عوام اور کارکنان اس بات کو اچھی طرح جانتے ہیں کہ ان کے دیے گئے عطیات کا ایک ایک روپیہ انتہائی شفاف اور بامقصد طریقے سے حقداروں تک پہنچایا اور تعمیری کاموں میں استعمال کیا جاتا ہے۔”
وجیہہ الدین نے مزید کہا کہ جماعت اسلامی نے اپنے بے لوث اور متحرک کارکنوں کی بدولت چترال میں کرپشن کے خلاف ایک بھرپور مہم کا آغاز کر رکھا ہے۔ رپورٹس کے مطابق کرپشن کے لحاظ سے چترال صوبے بھر میں تیسرے نمبر پر آچکا ہے، اور جماعت اسلامی کی یہ انسدادِ کرپشن مہم اس وقت تک جاری رہے گی جب تک چترال سے کرپشن کا خاتمہ اور حقیقی منزل کا حصول ممکن نہیں ہو جاتا۔
اس اہم ڈونرز کانفرنس میں جماعت اسلامی کے سینیئر رہنماؤں اور معززین نے بڑی تعداد میں شرکت کی۔ شرکاء میں نمایاں شخصیات مولانا جمشید احمد،شجاع الحق بیگ،ضیاء الدین استاذ،سیف الاحمد،سلیم الدین،قاری عبدالرحمن گجر،مولانا خلیق،جہانزیب احمد،عرفان عزیز،قاری سلامت،قاری فدا،پروفیسر ہدایت الاسلام،پروفیسر حسام الدین شامل تھیں
