چترال/ریجنل پولیس آفیسر ملاکنڈ سید فدا حسن شاہ اور ڈسٹرکٹ پولیس آفیسر لوئر چترال رفعت اللہ خان کے خصوصی احکامات کی روشنی میں لوئر چترال پولیس نے عوامی رابطہ مہم اور کمیونٹی پولیسنگ کو تیز کر دیا ہے۔ اس سلسلے میں عوام اور پولیس کے درمیان تعاون کو بڑھانے اور جرائم کے خلاف آگاہی فراہم کرنے کے لیے پبلک لیزان کمیٹی (PLC) کے ممبران کے ساتھ میٹنگز کا سلسلہ جاری ہے۔اسی کڑی کے تحت ایس ڈی پی او سرکل بمبوریت حسن اللہ نے بریر ویلی میں ایک اہم میٹنگ کی صدارت کی۔ اجلاس میں علاقہ بھر سے جید علمائے کرام، ایس ایچ او تھانہ ایون ایس آئی کفایت اللہ، سابق اقلیتی ممبر تحصیل کونسل آنت بیگ، معروف سماجی کارکنان شمس الرحمن اور محمد ابراہیم سمیت معتبرات علاقہ، کیلاش کمیونٹی کے قاضی صاحبان اور دیگر پولیس افسران نے بڑی تعداد میں شرکت کی۔میٹنگ سے خطاب کرتے ہوئے ایس ڈی پی او بمبوریت حسن اللہ نے کہا:”پولیس اور عوام کے درمیان جتنے کم فاصلے ہوں گے، معاشرے سے جرائم کا خاتمہ اتنا ہی آسان ہوگا۔ عوامی تعاون سے نہ صرف جرائم کی شرح میں کمی آئے گی بلکہ جرائم پیشہ افراد کی حوصلہ شکنی بھی ہوگی۔”اجلاس کے دوران شرکاء نے آنے والے مشہور کیلاش فیسٹیول ’چلم جوشٹ‘ کے حوالے سے گفتگو کرتے ہوئے یقین دلایا کہ بریر ویلی کے مقامی افراد ہر سال کی طرح اس سال بھی پولیس کے جوانوں اور سیاحوں کے ساتھ بھرپور تعاون کریں گے تاکہ میلہ پرامن اور خوشگوار ماحول میں منعقد ہوسکے۔پروگرام کے اختتام پر معتبرات علاقہ اور کمیٹی ممبران نے بریر اور گردونواح میں منشیات فروشوں کے خلاف لوئر چترال پولیس کی حالیہ سخت کارروائیوں کو سراہا۔ شرکاء نے متفقہ طور پر اس عزم کا اظہار کیا کہ وہ علاقے میں امن و امان برقرار رکھنے اور کسی بھی قسم کی غیر قانونی سرگرمی کی روک تھام کے لیے پولیس کے ساتھ کندھے سے کندھا ملا کر کھڑے رہیں گے۔
