چترال کے عوام نے اپنی روایتی مہمان نوازی کی روایت کو برقرار رکھتے ہوئے اپنے مغزز مہمان کا روایتی انداز میں استقبال کرکے اپنے روایت کو برقرار رکھا،ڈسٹرکٹ ناظم مغفرت شاہ

چترال (نمائندہ ڈیلی چترال نیوز) ضلع ناظم چترال مغفرت شاہ نے وزیر اعظم میاں نواز شریف کا چترال کے چوتھے دورے پر آنے اور ان کے مطالبے پر چترال میں ڈھائی سو بستروں کی ہسپتال اور جدید تقاضوں سے ہم آہنگ یونیورسٹی کے قیام کی منظوری دینے اور ڈسٹرکٹ گورنمنٹ کے لئے 20کروڑ روپے کی گرانٹ دینے پر شکریہ اد ا کرتے ہوئے اس امید کا بھی اظہار کیا ہے کہ مستقبل میں بھی چترال کے مسائل ان کی توجہ کا مرکز رہیں گے۔ ضلع نائب ناظم مولانا عبدالشکور ، تحصیل ناظم چترال مولانا محمد الیاس ، ممبران ضلع کونسل مولانا جمشید احمد، مولانا عبدالرحمن، مفتی محمود الحسن ، تحصیل کونسل کے ممبران محمد شریف، نذیر احمد، خان حیات اللہ خان اور دوسروں کی معیت میں ایک پریس کانفرنس سے خطاب کرتے ہوئے انہوں نے کہاکہ وزیر اعظم کے دورہ چترال کے سلسلے میں ان کے مشیر انجینئر امیر مقام کا بھی شکریہ اد ا کرتے ہیں جس نے اس دورے کو ممکن بنایا ۔ ضلع ناظم نے وزیر اعظم کے جلسہ عام کو کامیاب بنانے میں تمام سیاسی جماعتوں ، سول سوسائٹی کے تنظیموں پریس کلب، تجار یونین، بار ایسوسی ایشن، ڈرائیورز یونین اور منتخب بلدیاتی نمائندوں کے کردار کو بھی سراہتے ہوئے کہاکہ اس کامیابی میں سب نے برابر کردار ادا کیا۔ انہوں نے کہاکہ چترال کے عوام نے اپنی روایتی مہمان نوازی کی روایت کو برقرار رکھتے ہوئے اپنے مغزز مہمان کا روایتی انداز میں استقبال کرکے اپنے روایت کو برقرار رکھا۔