آیون کالاش ویلیز روڈ کی تعمیر میں مسلسل تاخیر کے سلسلے میں جرگہ کا انعقاد ، سی ڈی ایم کی طرف سے بھر تعاون کا اعلان ، روڈ کی تعمیر کے حوالے سے کمپرومائز نہیں کیا جائے گا ، جرگہ اعلامیہ

چترال ( محکم الدین ) گذشتہ روز آیون وی سی آفس میں ایک گرانڈ جرگہ آیون اتحاد کونسل کی سربراہی میں آیون کے مشہور و معروف سیاسی وسماجی شخصیت سابق صدر پی ٹی آئی محمد جناح لال کی صدارت میں منعقد ہوا۔ جسمیں چترال ڈیویلپمنٹ مؤمنٹ کے عہدیداران چیرمین سی ڈی ایم شبیر احمد، وائس پریزیڈنٹ لیاقت علی، سید برھان شاہ ایڈوکیٹ، عنایت اللہ اسیر آیون کے مساجد کے آئمہ کرام ، آل پارٹیز آیون کے نمائندگان موجود تھے،
اس گرانڈ جرگہ میں عمائدین آیون کے خدشات اور درپیش مسائل پر بات کرتے ہوئے صدر آیون اتحاد کونسل وجیہہ الدین چیرمین وی سی ون آیون نے کہا کہ کالاش ویلیز روڈ کی تعمیر میں مسلسل تاخیرسے اہلیان آیون کی برداشت کا پیمانہ لبریز ہو چکا ہے۔ اگر عوام نے کوئی نامناسب ری ایکشن این ایچ اے کی ناقص کارکردگی پر دیا تو اس کی ذمہ داری این ایچ اے اور کنٹریکٹر پر عائد ہوگی ۔ آیون اینڈ کالاش ویلیز روڈ نہ صرف اہلیان آیون کیلئے اہمیت کا حامل ہے بلکہ یہ سڑک پاکستان کے معاشی، سیاسی، ثقافتی و سیاحتی مفادات کا بھی ضامن ہے۔ ہم کسی ادارے کو ملک کے ساتھ ناانصافی یا غداری کرنے نہیں دیں گے۔ اسلئے حکومت سے پر زور مطالبہ ہے کہ عوامی رد عمل سے پہلے پہلے آیون اینڈ کالاش ویلیز روڈ کی سیکشن ون کو جلد از جلد مکمل کیا جائے۔
اس موقع پر مختلف پارٹیز کے نمائندگان نے اس سڑک کی اہمیت پر بات کی اور امید ظاہر کرتے ہوئے کہا کہ حکومت کسی بھی عوامی رد عمل سے پہلے پہلےاس سڑک کی تعمیر کی ذمہ داری احسن طریقے سے سر انجام دے گی۔
سی ڈی ایم کے نمائندہ سید برھان شاہ ایڈوکیٹ نے خطاب کرتے ہوئے کہا کہ ہم چترال میں تمام سڑکوں کیلئے عدالت میں پیٹیشن دائر کرچکے ہیں، جس کی وجہ سے آیون اینڈ ویلیز روڈ کا کنٹریکٹر اور پی ڈی این ایچ اے بھی ہمارا مخالف ہے۔ اس کیس کی شنوائی 12 ستمبر کو ہے جس میں ادارہ این ایچ اے سے کارکردگی رپورٹ مانگا گیا ہے۔ ہم دیکھتے ہیں کہ این ایچ اے آیون اینڈ کالاش ویلیز روڈ کے بارے میں کیا رپورٹ عدالت کو فراہم کرتا ہے۔ اس کے بعد ہم اپنے دوسریے لائحہ عمل کا باقائدہ اعلان کریں گے۔
وائس پریزیڈنٹ سی ڈی ایم لیاقت علی نے خطاب کرتے ہوئے کہا کہ 12 تاریخ کواین ایچ اے کارکردگی رپورٹ کی عدالت میں پیشی کے بعد اگر ہم کام کے حوالے سے مطمئن نہیں ہوئے ،تو ہمیں اگلے لائحہ عمل کیلئے عوامی سپورٹ کی سخت ضرورت پڑے گی۔ ہمیں امید ہے کہ اہلیان آیون اس جہاد میں ہماری مدد کرنے میں کوئی کسر نہیں چھوڑیں گے۔
آخر میں صدر محفل محمد جناح لال نے جرگہ سے پرجوش تقریر کرتے ہوئے کہا ہے اہلیان آیون کی ایک تاریخ ہے جس سے حکام بالا اچھی طرح سے واقف ہیں۔ ہمیں مجبور نہ کیا جائے۔ ہم ریاست کی بقا کی جنگ لڑرہے ہیں۔ ہم ریاست کی عسکری، سیاسی، ثقافتی، سیاحتی، معاشی و سماجی ترقی کی بات کرتے ہیں۔ اور آیون اینڈ کالاش ویلیز روڈ ملک خداداد کیلئے ایک انتہائی اہمیت کا حامل ضروری شاہراہِ ہے۔ اس کی جلد تکمیل کیلئے ہم کسی بھی حد تک جانے کیلئے تیار ہیں۔
جرگہ میں تمام شرکاء محفل نے اتفاقاً کہا کہ ہمیں سڑک کے کسی نئے ڈیزائن کی ضرورت نہیں۔ جو پرانا ڈیزائن این ایچ اے کے پاس موجود ہے اس کے مطابق جلد سیکشن ون کو مکمل کرکے عوام کے حوالے کیا جائے۔