چترال: عمران خان کی گرتی ہوئی صحت کے خلاف پی ٹی آئی اور انصاف یوتھ ونگ کا احتجاج

​چترال (نمائندہ)پاکستان تحریکِ انصاف (PTI) اور انصاف یوتھ ونگ لوئر چترال کے زیرِ اہتمام بانی پی ٹی آئی عمران خان کی بگڑتی ہوئی صحت اور جیل میں طبی سہولیات کی عدم فراہمی کے خلاف چترال پریس کلب کے سامنے ایک پرجوش احتجاجی مظاہرہ کیا گیا۔ احتجاج میں پارٹی کارکنوں اوریوتھ ونگ کے نوجوانوں نے بڑی تعداد میں شرکت کی، جنہوں نے عمران خان کے حق میں شدید نعرے بازی کی۔
احتجاجی مظاہرے کی قیادت پی ٹی آئی لوئر چترال کے جنرل سیکرٹری فرید جان اور صدر انصاف یوتھ ونگ شفیق الرحمن نے کی۔ اس موقع پر خطاب کرتے ہوئے فرید جان نے کہا کہ عمران خان کی آنکھ کی بینائی کے حوالے سے سامنے آنے والی حالیہ طبی رپورٹ نے پورے ملک کے کارکنوں میں تشویش کی لہر دوڑا دی ہے۔ انہوں نے الزام عائد کیا کہ جان بوجھ کر بانی پی ٹی آئی کو بنیادی طبی حق سے محروم رکھا جارہا ہے، جو کہ انسانی حقوق کی سنگین خلاف ورزی ہے۔
​مظاہرین نے حکومت اور متعلقہ اداروں سے مطالبات کیے:
​عمران خان کا ان کے ذاتی معالجین (Personal Doctors) سے فوری اور مکمل معائنہ کروایا جائے۔
​آنکھ کے علاج کے لیے انہیں ملک کے بہترین ہسپتال یا جہاں وہ چاہیں منتقل کیا جائے۔
​جیل مینوئل کے مطابق تمام سہولیات فراہم کی جائیں اور ان کی صحت پر کوئی سمجھوتہ نہ کیا جائے۔
انصاف یوتھ ونگ کے صدر شفیق الرحمن نے اپنے خطاب میں کہا کہ نوجوان اپنے لیڈر کی زندگی کے حوالے سے انتہائی فکر مند ہیں۔ انہوں نے خبردار کیا کہ اگر عمران خان کی صحت کے حوالے سے کوئی بھی ناخوشگوار صورتحال پیدا ہوئی تو اس کی تمام تر ذمہ داری موجودہ حکومت اور جیل انتظامیہ پر ہوگی۔ انہوں نے مزید کہا کہ چترال کا بچہ بچہ اپنے لیڈر کے تحفظ کے لیے سڑکوں پر نکلنے کو تیار ہے۔
مظاہرے کے اختتام پر شرکاء نے پریس کلب کے سامنے علامتی دھرنا دیا اور اس عزم کا اظہار کیا کہ جب تک عمران خان کو مکمل طبی ریلیف نہیں ملتا، احتجاج کا یہ سلسلہ جاری رہے گا۔ بعد ازاں، عمران خان کی جلد صحت یابی کے لیے دعا بھی کی گئی۔