چترال میں ماہ رمضان کیلئے انتظامیہ کی طرف سے مانیٹرنگ ڈیسک کا قیام ، ڈپٹی کمشنر نے ڈسک کا معائنہ کیا

چترال (محکم الدین)چترال میں گذشتہ سال کی طرح امسال بھی صوبائی حکومت کے احکامات کے مطابق ماہ رمضان میں اشیاء خوردونوش کی قیمتوں کو کنٹرول کرنے کیلئے مانیٹرنگ ڈیسک کا قیام عمل لایا گیا ہے ۔اتالیق پل چترال میں قائم کردہ اس ڈیسک میں انتظامیہ کے اہلکار مستقل طور پر ڈیوٹی سر انجام دیں گے اور کسی بھی طرح ناجائز منافع خوری ، گرانفروشی کی صورت میں ان کے پاس شکایات درج کی جا سکتی ہیں۔ جمعرات کے روز ڈپٹی کمشنر چترال محسن اقبال نے اس ڈیسک کی وزٹ کی اور متعلقہ اہلکاروں کو ہدایت کی کہ قیمتوں پر کنٹرول میں کسی سے بھی کوئی رعایت نہ برتی جائے ۔ ایسے افراد کے خلاف قانونی کاروائی کی جائے ۔
درین اثنا عوامی حلقوں نے اس ڈیسک کے بارے میں میڈیا سے بات کرتے ہوئے کہا ۔ کہ یہ ایک خانہ پوری ہے ۔ جو ضلعی انتظامیہ کے آفیسران صوبائی حکومت کے احکامات پر قائم کرتے ہیں لیکن گذشتہ سال کے مشاہدے میں آیا ہے کہ اس ڈیسک سے عوام کو کچھ حاصل ہونا نہیں ہے ۔ گذشتہ سال رمضان کے پورے مہینے میں لوگ گوشت کی بوٹی کو ترستے رہے ۔ اسی طرح مرغیوں کی عدم دستیابی بھی روزہ داروں کیلئے مسئلہ بنا رہا اور امسال بھی اس سے کچھ بہتر ہونے کی توقع نہیں ہے ۔