چترال(نامہ نگار) لوئر چترال کے ڈپٹی کمشنر راؤ ہاشم عظیم نے یونیورسٹی آف چترال کا دورہ کیا اور وائس چانسلر پروفیسر ڈاکٹر حاضراللہ سے ان کے دفتر میں ملاقات کی۔ ملاقات کے دوران باہمی دلچسپی کے مختلف شعبوں پر تبادلہ خیال کیا گیا جن میں آئندہ موسم گرما میں شجر کاری مہم کے لیے تعاون شامل ہے۔ ڈپٹی کمشنر نے بتایا کہ ضلعی انتظامیہ اس مہم کے لیے پھل دار پودے فراہم کرے گی جبکہ یونیورسٹی آف چترال شجرکاری کی کوششوں میں مدد کے لیے رضاکاروں کو شامل کرے گی۔ وائس چانسلر اور ڈپٹی کمشنر نے ماحولیاتی استحکام اور کمیونٹی کی شمولیت کو فروغ دینے کے عزم کا اظہار کیا۔
وائس چانسلر نے ڈپٹی کمشنر کو تعلیمی ترقی، تحقیقی تعاون اور انسانی وسائل کے اشتراک میں مکمل تعاون کا یقین دلایا۔ ڈپٹی کمشنر نے یونیورسٹی کے لیے اپنا تعاون جاری رکھنے کا یقین دلایا اور چترال کے نوجوانوں کی بہتری اور مجموعی تعلیمی ترقی کے لیے مل کر کام کرنے کی اہمیت پر زور دیا۔
میٹنگ کے بعد جناب راؤ ہاشم عظیم نے وائس چانسلر کے ہمراہ یونیورسٹی کے مختلف حصوں کا دورہ کیا اور یونیورسٹی کی زیر تعمیر سائٹ کا بھی دورہ کیا۔ وائس چانسلر نے مہمان کو شیلڈ پیش کی۔
یہ دورہ علاقے کی سماجی و تعلیمی ترقی کے لیے ضلعی انتظامیہ اور یونیورسٹی آف چترال کے درمیان تعاون کو مضبوط بنانے کی جانب ایک اہم قدم ہے۔
