چترال (نامہ نگار)نیشنل انٹیگرل ڈویلپمنٹ ایسوسی ایشن (نِدا پاکستان) نے پاکستان پاورٹی ایلیویشن فنڈ (PPAF) کے تعاون اور ضلعی انتظامیہ چترال کے اشتراک سے یومِ تشکر کی ایک پُروقار اور ملی جذبے سے بھرپور تقریب کا انعقاد کیا۔ یہ تقریب پاکستان کی روح، اس کے محافظوں کو خراجِ عقیدت اور قومی کامیابی "بنیان مرصوص” کے اعتراف میں منائی گئی۔
تقریب کی صدارت اسسٹنٹ کمشنر چترال محمد ضیاء نے کی۔ اس موقع پر مختلف شعبہ ہائے زندگی سے تعلق رکھنے والے افراد نے بھرپور شرکت کی، جن میں سرکاری محکموں کے سربراہان، سیاسی و سماجی قائدین، علمائے کرام، طلباء، عام شہری اور چترال بھر کی نمایندہ شخصیات شامل تھیں۔ شرکاء کی یہ رنگارنگ شرکت قومی اتحاد و یگانگت کی علامت اور ہر دل میں بسنے والی محبتِ پاکستان کا مظہر تھی۔
تقریب کا آغاز قومی پرچم کشائی سے ہوا، جس کے بعد ملی نغمے، تقاریر اور یومِ یکجہتی واک کا انعقاد کیا گیا، جس نے وطن عزیز کی استقامت اور عظمت کو خراجِ تحسین پیش کیا۔ اس موقع پر شہداء، قومی ہیروز اور محسنینِ وطن کے لیے فاتحہ خوانی اور دعائیں کی گئیں۔
یومِ تشکر ایک زبردست قومی پیغام بن کر اُبھرا، جو پاکستان کے صبر، استقامت، اور کثیر الثقافتی وحدت کا عکاس تھا۔ اس تقریب نے نہ صرف حب الوطنی کے جذبے کو تازہ کیا بلکہ امن، ترقی اور خوشحالی کے لیے ہمارے اجتماعی عزم کی تجدید بھی کی۔
نِدا پاکستان PPAF، ضلعی انتظامیہ چترال اور تمام شہریوں کا تہہ دل سے شکریہ ادا کرتا ہے جنہوں نے اس قومی فخر کی تقریب کو کامیاب بنایا۔ شرکاء نے یہ ثابت کیا کہ ہم سب متحد ہیں، اپنے ماضی پر فخر ہے اور ایک مضبوط پاکستان کے لیے پُرامید ہیں۔
مہمانِ خصوصی نے PPAF کے قومی مقصد کے لیے تعاون کو سراہا۔
